Yolŋunydja djäka yukurruna wäŋawu bewala ŋurruṉaŋgal. Ŋilimurruŋgu dhäwu’ malanha ŋulaŋuru bili ŋäthiliŋuŋuru gurrupanara ŋaḻapaḻmirriwuŋu. Ŋilimurru buku-wekama ga makmakthun ŋunhi ṉurrku’ walalaŋgu ŋaḻapaḻmirriwu ga märr-nherraṉminyara gurrunhan ŋunhiyi ḻuku ŋilimurruŋgu yolŋuwu. Ŋilimuruŋgu ŋaḻapaḻmirri yukurrana bitjarra bili dhukarr-lakaraŋala ga  milkuŋala nhaltjan yurru djäka ŋilimurruŋgiyangalaŋuwu wäŋawu ga ŋunhiyi malanha ŋilimurruŋgala ŋayaŋuŋura mirithirri manymak dhiyaŋu bala bitjan yurru dhärra ŋurruŋu ga rom-ḻakarama nhaltjan ŋali  yurru djäma. Dhiyaŋunydja yurru galmuma marrtji bala ŋunhiyi yutakunhara djarr’yunara djäma malanha. Buku-wekama yukurra nhämunha’nha rirrakay märrama ga marŋgithirri ŋaḻapaḻmirriwala bukmakŋuru bäpurru’ŋuru miṯtjiŋuru ŋilimurruŋgala wäŋaŋura ŋunhi yukurra walalanha rirrakay märrama. Ŋunhi walala gurrupan walalaŋguway ŋurrku’ wäŋawu djäkawu Yolŋukurru dhukarrkurru, nhaltjarra yukurrana ŋäthili baman’ ga nhaltjan ŋilimurru yurru nhäma ga djäma dhiyaŋu bala. Gurrupan walala marrtji warwu walalaŋguway  ga ŋayaŋu nhaltjan yurru yuwalk. Waŋa walala yukurra ŋarakalili ga romlili nhaltjan yurru nhina ŋamathama ga mäwaya ŋayaŋu. Ŋaḻapaḻmirrinydja ŋilimurruŋgu dhuwala balanyara bitjan djorra’na. Ŋilimurru yukurra buku-wekama walalanha liyawu walalaŋgu ga waŋa nhumalanha nhuma yurru ŋäma ga buthuru-witjun dhäwu’wu walalaŋgu.