Baman’ ŋilimurru djäka dhiyaku wäŋawu, wapmaranha  ŋilimurru ŋuli nha malanha merrpal wo wäyin monuk ga gapu raypinyŋuru ga diltjiŋura malanha yukurra ŋorra ŋatha, ga marŋgithirri ŋuli nhäyu waluyu ŋunhi manymak marrtjinarawu larrunanharawu ŋuriki malaŋuwu. Ga bitjan bili djäka dhiyaku wäŋawu märr yurru ḏarrtjalk wäŋa djingaryun. Ŋilimurrunha ŋuli marŋgikuma ga maŋutji-ḻakarama ŋunhi ŋayi ŋuli burwu’mirriyirri, ŋuriŋiyinydja ŋuli ŋuriŋi maŋutji-ḻakarama ŋilimurruŋgu  nhä malanha wäyin,ŋarirri’ wo wiripu malanha merrpal’ marranharawu. Wo marrtjinyarawu gungawu märrnharawu ŋuriŋi ŋayi ŋuli maŋutji-ḻakarama. Dhaŋaŋ ŋayi yäku malanha yukurra ŋorra dhiyaku malaŋuwu wäŋawu, bathala ŋayi yäku ga bulu nyumukuṉiny’ yäku ga wiripundjay ŋayi maḏayin’nha yäku ŋuli ŋorra ŋunhiyi wäŋa. Djorra’lili ŋilimurru ŋuli djäma ŋunhi mali wäŋa ga nhä malanha yäku ŋunhilimi wäŋaŋura. Djäma ŋilimurru ŋuli ŋaḻaŋaḻmirriwala ga marŋgithirri walalaŋgala ga nhaltjan ŋilimurru yurru wekanhamirri bala ga lili. Dhaŋaŋ malanha yukurra ŋorra yuṯa rerri bitjan mulmu ga wiripu malanha wäyin ga yolŋu ŋunhi ŋayi yakana yurru gärri balayi wäŋalili. Ŋilimurru yurru gulmarama balanyara malanha märr yurru yaka balayi gärri ŋanapurruŋgala wäŋalili ga buma ŋanapurrŋgu dhuwala wäŋa.

Dhuwala ŋilimurru yukurra yuta djäma yäku marŋgithirri wäŋawu , dhiyaŋuna ŋayi ŋuli manapan Djäkami Wäŋawu djamamirrinha rrambaŋikuŋu ŋilimurrunha ga ŋaḻapalmirrinha märr ŋilimurrru ŋuli marŋgi wekaŋu ŋunha wäŋaŋura märr ŋilimurru ŋuli dhäkay-ŋäku ŋunha wäŋa ŋayi ŋuli marrkapthurru. Dhuwala ŋilimurru ŋuli djäma dhawaṯmaraŋu wiripuyu watayu  malaŋuyu nhä ŋatha manymak yukurra ŋorra, dharpa malanha ga wäyin malanha ŋunhi yukurra watayu maŋutji-lakarama. Wukirri ŋilimurru  ŋuli djorra’lili nhä malanha dhäwu’ ga yäku wäŋa malanha, ga marŋgithirri nhä malanha miriŋu ŋilimurruŋgalaŋuwu wäŋawu. Ŋulaŋuruna ŋilimurru ŋuli djorra’lilinydja djäma  wäŋanydja malanha wanhaka malanha maḏayin’ miny’tji ga waŋarr ŋuriŋuna ŋayi ŋuli lakaraŋu nhaltjan ŋilimurru yurru djäka wäŋawu.