Ŋäthili bewala birr’, ŋurruṉaŋgal ŋilimurruŋgu ŋaḻapaḻmirri yukurrana marrtjina balanyara bitjan rangers, Yolŋu rangers ga djäka walala yukurrana dhiyaku wäŋawu Yirralkawu. Walala ŋuli ḻarrurrnha ŋathawu, walala ŋuli marrtjinya wata ŋupana ga dhuŋgur’yuna marrtjinya. Djäka walala yukurrana wäŋawu, maḏayin’ku ga wanhaka gapu malanha , walala ŋuli djäka bukmakku wäŋawu. Yolŋunydja marŋgi bukmak ŋunhiyinydja bala ŋäthilinydja, walala yukurrana ŋayathaŋala romdja ḏälkuŋala romgurru ga gurruṯukurru. Ŋilimurru Yolŋu dhiyaŋu bala, ŋilimurrunydja yukurra bitjandhiyi bili. Djäkami Wäŋawu (Rangers) baḏak djäka yukurra dhiyaku Yirralkawu, ŋilimurrunydja dhuwala romgu djäkami walala.

Ŋilimurruŋgu ŋaḻapaḻmirri bukmakŋuru 14 bäpurru’ŋuru waŋgany-manapanmirri ŋuriŋi bala 30 years-thu dhäruk ŋänharamirri ga nhaltjana bini yoranhaminya ga dhukarrmirriyanha balandawu dhanu’yunarawu, ŋuruku bala illegal-wu gali’wu maḏayin’ku, mulkuruwu mulmu ga dharpawu ga feral-wu wäyingu dhiyalami ŋilimurruŋgala Yirralkaŋura. Dhimurrunydja walala ŋurru-yirr’yurruna djämamirriyanharawu dhiyaku North East Arnhemland-gu wäŋawu ga ŋoy gapuwu ga Yirralkanydja djämamirriyanharawu homelands-ku.

Dhuwala Yolŋu Knowledge Framework-thu yukurra waŋgany manapan Yirralka ga Dhimurrunha rrambaŋikumana. Staff walala ŋurru’ŋurruŋu dhipuŋuru organisation-ŋuru dhä- wirrka’yun  40-nha yolŋu’yolŋunha marŋgimirrinha 14 bäpurru’ŋuru miṯtjiŋuru märr yurru marŋgithirri walalaŋguŋu nhänharapuy nhaltjan yurru Dhimurru ga Yirralka djäma rrambaŋi djalkiriŋuru Yolŋu Romŋuru.

Ŋilimurruŋgu ŋaḻapaḻmirri yukurrana djäka ga milkuŋala ŋilimurruŋguŋu birrka’yunara märr yurru buku-warkthun yuṯa dhukarr djämamirriyanharawu ŋilimurruŋgalaŋuwu Yirralkawu, djäka marrtji ŋilimurruŋgu märr yurru ŋilimurru djäka wäŋawu ŋilimurruŋgala djälyu märr yurru ŋilimurruway djarr’yun rom malanha, birrka’yunara ga djäma. Nhinanydja ŋilimurru yukurra dhuwala yuṯaŋurana ga ŋilimurru yurru ŋäpaki’wuna bäki girri’ malanha djämawu balanyarawu nhäku malaŋuwu ŋunhi walala gäŋala dhipala ŋilimurruŋgala wäŋalili. Yurru ŋilimurruŋgu nhänharawuynydja ga djämanydja yurru dhiyalana bili ŋilimurruŋgala wäwunŋuŋura romŋura ga djäkaŋura dhiyaku Yirralkawu.

Dhimurru ga Yirralkanydja bilina yukurra djäma rrambaŋina märr walala yurru marŋgithirri ŋilimurruŋgalaŋuwala ŋaḻapaḻmirriwala, märr yurru walala guyaŋirri ŋamathama nhaltjan walala yurru bulu ŋamaŋamayun ŋilimurruŋgu djäma ga guyaŋirri ga makmakthun ŋilimurruŋgalaŋuwu ŋaḻapaḻmirriwu, ŋilimurruŋgu rom, ŋilimurruŋgu djäma malanha ga ŋilimurruŋgu dhukarr  ŋunhi yurru ŋurru-warryun. Dhuwala website details ŋunhi ŋilimurruŋgu yuta guyaŋinyara, dhukarr, gurrunhanara ga djämawuy ,dhathar’yuna yukurra ŋurruŋuna ŋunhi ŋilimurru yukurra marrtjina dharaŋanarawuna ŋilimurru dhuwala Rangers Djäkami Wäŋawu.