Ŋilimurruŋgala ŋaḻapaḻmirriyu wekaŋala ŋilimurruŋgu dhuwala rom malanha ŋilimurruŋgala. Dhuwala ŋilimurruŋgu wäŋa rrambaŋiyirri yurru maṉḏa ŋapaki’ ga Yolŋu rom. Ŋilimurru ŋuli bitjan bili wäthun mulkuruwu yolŋuwu ŋunhi nhanŋu wiripu rom, ga marrtji walala ŋuli lili ga makmakthun ŋilimurruŋgalaŋuwu romgu ga gakal’wu. Dhiyaŋu gurruṯuyu ŋilimurru ŋuli latju’kuma nhina ga mulka ŋilimurruŋgala ḏoṯurrkthu. Ga wekanhamirri guyaŋinyara bala ga lili, dhiyaŋu romdhu ŋilimurrunha ŋuli ŋayaŋu latju’kuma ga dhuwala wäŋa ŋilimurruŋgu.

Yirralka ga Dhimurruwu guḻku’ mirithirri melŋu’ mala ga yuṯanha ŋilimurru yurru gärrinyamarama djämalili guŋga’yunarawu ŋilimurruŋgu ga marŋgi-gathanarawu yäku Djäkami Wäŋawu. Bitjan ŋunha ŋayi ŋuli manapanmirri monuk ga raypiny gapu dhiyaŋunydja ŋayi ŋuli romdhu ḻapmamarama maŋutji märr ŋilimurru yurru nhäma bulal’ rom,  yolŋu ga ŋapaki’ rrambaŋi.

Ga gatjpu’yundja ŋilimurru yukurra dhiyaku romgu märr ŋayi yurru ḏäl djingaryun ga guŋga’yun ŋayi yurru dhiyaŋu romdhu ŋal’mamarama ŋanya ga marrparaŋguma rom ŋilimurruŋgu.

Guŋga’yunarawu ŋilimurru djäl märr yurru ŋilimurruŋgu yolŋuwu gatjpu’ ŋal’yun ga märr yurru rrambaŋi nhäma bala ga lili ga djäma rrambaŋi. Ga ŋunhi ŋayi ŋuli ŋuriki djämawu djälthi yolŋu, ŋilimurrunydja ŋuli ŋulawitjurru bili romgurru ŋanya yolŋunha gäŋu, ga ŋunhi nhamuny’ yolŋuyu yukurra ŋayathama rom ga nhina yukurra, yolŋu ŋayi djämamirri, rrambaŋi djäma ŋapaki’ walala.