Djäka ŋilimurru yurru dhiyaku wäŋawu märr yurru ŋilimurru manymakuma nhina. Marŋgithirri ŋilimurru ŋuli ŋuriki wäŋawu  märr ŋilimurru yurru djäka latju’kuma. Marŋgithirri  ŋilimurru ŋuli romgurru ga manikaykurru märr ŋilimurru yurru nhäma ga ŋäma nhä malanha ŋayi ŋuli maŋutji-ḻakama dhiyaŋu wäŋayu. Romdhu ga gakal’yu ŋuni ŋanapurruŋgu wekaŋala ŋaḻapaḻmirriyu ḻakarama ŋilimurruŋgu ŋuli nhä, wanhaka ga wanhami ŋilimurru yurru märrama ŋatha. Marŋgikunha ŋilimurrunha ŋuli nhaltjan ŋilimurru  yurru djäka manymakkuma nhäku malanha wäyingu wo man’tjarrwu ŋunhi yukurra ŋorra dhiyalmi wäŋaŋura ga nhaltjan ŋilimurru yurru wekanhamirri gurruṯu bala ga lili. Latju’ ŋunhi ŋanapurruŋgu djamarrkuḻi’yu ŋuli märrama dhuwala dhawu’ ŋanapurruŋgala. Ga yol ŋayi Djäkami Wäŋawu märr ŋilimurru marŋgi ga dhäkay-ŋäma ŋilimurru ŋuli ŋayaŋuyu manymak malanha. Ga ŋunhi ŋilimurru ŋuli marrtji wakir’yun ŋanapurru ŋuli märrama dhäwu’ malanha nhaltjan ŋilimurru yurru djäka dhiyaku wäŋawu. Ga marŋgikuma ŋilimurruŋgu ŋaḻapaḻmirrinha ga djamarrkuḻi’nha. Nhäma ŋilimurru ŋuli nhä ŋayi ŋuli wiripuyirri märr ŋilimurru yurru malŋ’marama dhukarr nhaltjan ŋilimurru yurru djäma manymakkuma. Ga nhäma nhä malanha ŋilimurru ŋuli bäki märr ŋilimurru yurru djäka manymakkuma dhiyaku wäŋawu.