Gurthandja ŋilimurruŋgu rom wekaŋala ŋilimurrungala waŋarryu ga ŋaḻapalmirriwala ŋilimurruŋgala ga ŋilimurruŋgala ŋaḻapaḻmiriyunydja ŋilimurruŋguna wekaŋala. Ŋilimurruŋgala  ŋaḻapaḻmirriyu baḏak yukurra ŋayathama dhuwala rom. Gurthayunydja maḏayin’ yukurra rom ŋayathama ŋilimurruŋgu , yutakuma ŋayi ŋuli walŋa ŋilimurruŋgu, rrambaŋikuma ŋayi ŋuli ŋilimurrunha ga ḏulpu-wekama ŋayi ŋuli ŋilimurrunha  ga dhuwala wäŋa ŋilimurruŋgu,  rumbal ga birrimbirr. Ŋilimurruŋgu  wäŋarr Djulpan, dhiyaŋu yapa’manydjiyu yurru dhuŋgur’yuna wäŋa ŋilimurruŋgu  ŋathilinydja, nhäma ŋilimurru  ŋuli ŋawulul’ wiripuŋura wäŋaŋura bala ŋuriŋina ŋilimurru ŋuli marŋgithirrinydja  bala dhuŋgur’yuna marrtji wäŋanydja malanha. Malthun ŋilimurru ŋuli ŋuriŋi dhiyala wäŋaŋura ŋilimurruŋgala ŋunhi yukurra ŋilimurru marŋgiyirri, ga dhukarrwu malthun ŋaḻapaḻmirriwu ŋuriki waluwu, wanhaka ga nhäku yurru dhuŋgur’yun. Dhuwalanydja yäku Worrk- dhuwalanydja bitjan rom nhäma gurtha- dhuwalanydja ŋilimurruŋgu dhukarr dhuŋgur’yunarawu gurthawu.

Yolŋu djäkamiyu yukurra guŋga’yun yuṯayu girri’yu malaŋuyu ga wekama ŋilimurruŋgu  yuta malanha guyaŋaŋinyarawu nhaltjan ŋilimurru yurru dhuŋgur’yun dhuwala wäŋa malanha ga nhaltjan ŋilimurru  yurru gurrum’thun ga galmuma Yolŋuwu gurtha wanhawitjan yurru watayu bo’yun. Ŋilimurru yukurra guŋga’yun ŋilimurruŋgu ŋaḻapaḻmirrinha märr yurru gurrupaṉ walalaŋgu guyaŋinyara djämawuy  räli wekama yuṯanha  djamarrkuḻi’nha. Dhiyakuna ŋilimurru yurru rrambaŋgithirri märr yurru guŋga’yun gurtha djäkami program malanha ga Yirralka wäŋa djäl malanha. Ŋilimurru yurru djäka ŋunhi ŋilimurru yurru dhuŋgur’yun ga nhäku ga gurum’ ŋanya gäma dhuwala yuṯa dhukarr märr ŋilimurru yurru yaka ḻarruma ga winya’yunmarama dhuwala dhuŋgur’yunaramiri rom.